BJP President Pu Vanlalhmuaka’n Mizoram sawrkar Pu Lalduhoma kaihhruaiin Central sawrkar an dawr hlawhtling lo hle tih chu mipuiten an hria a ti. He thu hi vawiina Aizawl Press Club-a Press Conference ah sawiin Pu Vanlalhmuaka chuan Mizoram CM Pu Lalduhoma leh a thawhpuiten sawrkar laipui an dawrin an hlawhtling lo hle a ti a, khumbeu leh Mizo puan chi hrang hrang pe in thla an lakpui chu an thlen san ber a ni tih a sawi.
BJP President chuan state inthlanah BJP chu ar chuk tuilo khawpin sawichhiat a ni a ti a, BJP inhlauh siakna in vote zawn thin ani tih sawiin Mizo mipuite chu hmasawn an duh chuan fin thiam a tul tawh tih a sawi. Pu Hmuaka chuan sawrkar laipuia BJP hotute nen an inhmuhin Lok Sabha ah thlan tlin anih chuan Mizoram hmasawnna tur lian tam tak sawrkar laipuiin an tihsak dawn a ti a, Hmarchhak state ah State President MP inthlana ding awmchhun ani dawn tih sawiin thlan tlin anih chuan Central Minister ani thei dawn tih a sawi.
BJP President chuan Lok Sabha MP pakhatin Central sawrkar do a hlawk loh sia hrechiangtu chu MNF Predident Pu Zoramthanga leh a thawhpuite anni a ti a, BJP leh Hindu sawizawm thin chu party dang ho au hla ber ani tih sawiin Kristian Minister a awm theih nan amah vote tling turin mipuite a ngen a ni.
Pu Hmuaka chuan thlan tlin anih chuan PM Scheme hrang hrang mipuiten tangkai zawka an hman theih nan hma a la dawn a ti a, Mizoram chuan hmasawnna chu an ngaih pawimawh ber ani tih sawiin Mizoram hmasawnna chu sawrkar laipuia hotuten an tiam a ti bawk. BJP President chuan State sawrkar Pu Lalduhoma kaihhruaiin Central ah engmah sawi chhuah an nei theilo a ti a, a zin haw a Press Conference ah pawh hmasawnna tur an sawi chu hun hmasa lama hmalakna hlawhtlinna chauh ani tih sawiin an zinna hlawhchham lanna chu ZMC ah a chiang tih a sawi bawk.
