BJP nen sorkar intawm siam a, deputy chief minister a BJP MLA pakhat chu deputy chief minister-ah lak luh a ni dawn ni awma sawi chu chief minister Pu Lalduhoma chuan thu dik lo a ni a ti. BJP MLA Dr. K. Beichhua nena Delhi a zin duna BJP hruaitute hmu a puhna chungchanga chanchinbumite zawhna chhangin Pu Lalduhoma chuan Dr Beichhua nen hian an zin dun lo niin a sawi a.
Nilaini zana Delhi-a Assam Rifles hotute nena inremna an ziahna a Dr Beichhua a lo tel ve a hmuh thu a sawi a. Hetah hian ZPM, MNF leh BJP MLA te pawh an tel niin a sawi. Assembly inthlan hnuhnung berah ZPM chu party mala sorkar siam thei turin thlan tlin an ni a, party dang thawhpui an mamawh lo tih Pu Lalduhoma chuan a sawi a. He thil hi thuthang dik lo khawi atanga lo chhuak nge a nih pawh hriat loh a nih thu a sawi a ni.
Congress hruaitu leh minister hlui Pu John Rotluangliana chuan Zirtawpni khan Aizawla Congress Bhavan-ah Mizoramin deputy chief minister a nei mai thei tih sawi a hriat thu a sawi a. An tih ngam loh chuan BJP in an hrek an hlau si a, indawrna a kal mek tih chiang takin a hre thawi niin Pu John Rotluangliana chuan a sawi a ni.
