Mizoram BJP Candidate Pu Vanlalhmuaka chuan BJP chuan mipui hmaa an tiamte an ti hlawhtling thin tih a sawi a, party dangte angin manifesto an inziah mawi siak ve lo niin a sawi bawk. He thu hi nizana Khawzawla Alpha Hotel-a thuthar lakhawmtute a kawmnaa a sawi a ni a. Pu Vanlalhmuaka chuan ZPM sawrkar chu Central-ah a tlaltlum lo hle a, anhmahni pawhin zawmpui an nei lo an tih ang chiah hi an dinhmun a ni, a ti a. Mizoram sawrkara hlawhchham a, thil a tih theih loh chuan Zoramin a tuar a ni, a ti.
BJP Mizoram candidate Pu Vanlalhmuaka chuan Mizoram Congress Party ten BJP chu Kristiante nuai chimih tumtu ti a an sawi thin chu a dik lo a ni tiin, kum 1966-1986 inkar khan Congress sawrkarin Mizote hi ran angin min khalh khawm a, nasa takin min nghaisa a, tunah hian kan ram leh kan hnam tan, kan sakhaw him nan ti a auin, MPCC hruaitute hi an in enlet a ngai a, an ni tluka Kristiante hmelma, Mizote hmelma an awm lo a ni, tiin, Congress Party hian Delhi-a an hotute ko chhuakin Mizote hi ngaihdam dil tura a phut thu a sawi bawk a ni.
Pu Vanlalhmuaka chuan tun Lok Shaba MP inthlan neih turah hian BJP leh a thurualpui NDA te chuan seat 400 chuang an lak ngei a inbeisei tih a sawi bawk. Pu Vanlalhmuaka chuan Pathian leh mipui zara thlan tlin a nih chuan Khawzawl, Saitual leh Hnahthial district te chu district naupang ber ni mah se Mizorama district changkang ber, India ram a district entawn tlak bera siam tumin theihtawp chhuah a tum thu sawiin, hemi tihlawhtling tur hian April ni 19-ah Prime Minister Narendra Modi-a chu amah Pu Vanlalhmuaka kaltlanga vote turin Khawzawl mipuite a sawm a ni.
