BCM Rorelna sang ber Assembly in tangka kum thar 2024-25 budget atan cheng vaibelchhe 125, nuai 66 sing 6 leh sang 3 a ruahman. Baptist Church of Mizoram (BCM) Assembly vawi 128-na, Electric Veng Lunglei kohhranin a thlen chu nizan khan a tiak a. Nimin Pathianni chawhma inkhawm BCM General Secretary Rev. R. Lalbiakliana kaihhruaiah BCM President Rev. F. Ramdinmawia chuan Pro Pastor 12 leh Pro. Pastor ni lote nen an vaiin mi 15 te Minister atan lalutin a nemnghet (ordain) a. Chawhnuah Lalpa zanriah sacrament kilho a niin nizan khan vantlang inkhawm neih chhunzawmin Assembly hi a tiak. Thupuiah Inpumkhatna tih hman a ni. Statistician Report-in a tarlan zingah tun dinhmunah BCM hi Area Baptist Church (ABC) 17 awmin, Pastor Bial 92 leh Tualchhung Kohhran 678 an awm a, Kohhran member zawng zawng nuai 1, sing 7, sang 9 leh 280 an awm a, kum hmasa ai a member punna chu 2,876 a ni.
AGS – Mission Report chuan Mission Field hrang hrang 25-ah rawngbawl mek a nih thute, Missionary leh Mission hnuaiah thawktu mi 1,343, an awm thu te, kum 2023 chhungin Kohhran thar 16 leh Fellowship 15 dinin, ringthar 4,689 an awm thu a tarlang. President-elect atan Rev. Dr. C. Vanlaldika, tuna AICS Principal nilai chu thlan a ni a, Statistician atan Upa J. Lawmsanga, Serkawn thlan a ni bawk. Pay Commission vawi 12-na din a ni a, member 12 ruat nghal an ni. BCM Assembly hian kum 10 lo kal turah Pastor 180 vel tal neih a tum a, tunah hian Pastor 160 an awm a. Ram pawnah pastor 20 awmin Pro Pastor 18 an awm mek a, BCM pumpuiah Ordained Pastor 154 nei mekin Probationary Pastor 26 an vaiin 182 an awm mek. Tun Assembly-ah hian, Pastor 4 an pension ve thung anga Ordain Pastor 162 an awm anga Pro. Pastor 19 an awm thung anga an vaiin 181 an ni dawn a ni.
Tun tum Assembly rorel ah hian la langsar zingah MPF-te’n a thawhdun an sawmna chu rei tak ngaihtuah a nih hnu-ah uluk zawka la ngaihtuah chhunzawm ni se tihte, nasa zawka ruihhlo a do ni se tih te, ruihhlo leh eirukna dote, Sorkar laipuiin National Education Policy a kalpui turah HATIM ah pawh ruahmanna kalpui mek a nih thute tarlan a ni. A thlengtu Electric veng BCM hian assembly thlen na’n hian cheng nuai 38 vel budget ah an dah a ni.
