Vawiin hi Mizoram Baptist Kohhran Ni Pawimawh, ‘Naupangte Ni’ a ni a, BCM hnuaia tualchhung kohhran hrang hrang-ah Kristian Naupangte Ni hi ursun taka hman a ni.
Kumin Naupangte Ni thupui “Naupangte leh Rawngbawlna” (II Lalte 5: 1-3) hmangin Pathian thuchah ngaihthlak a ni a, naupangte rawngbawlna-a an pawimawhna leh Pathian hmanrua an nih theih dan bakah kohhran-a an dinhmun leh kohhran hmathlir an nih dan te zirtirna pek an ni. Naupangte pawhin he ni puala hian an thiam thil hrang hrangte entirin rawngbawlna an nei bawk.
Kum 2015 a Mizoram Baptist Kohhran Assembly Rorel inkhawm chuan Kohhran pum huapa naupangte ngaih pawimawhna lantirin, Kohhran mipuite inzirtirna hun atan ‘Naupangte Ni’ hman tha a ti a. Kum 2016 atang khan kum tin November Pathianni vawi thumna chu ‘Naupangte Ni’ atan hman a ni ta a ni. He Ni-ah hian Pathianni chawhma Inkhawmah Naupangte pawimawhna leh kaihhruaina lam zirtirna te ngaihthlak a ni thin a, Kohhran pum huapa naupangte pawimawhna inzirtirna hun atan tangkai takin an hmang hman thin a ni.
