Bangladesh sawrkar leh Kuki-Chin National Front (KNF) pailaite chuan a ṭum hnihna atan inremna siam tumin inbiakna an neih thu Kuki-Chin National Front (KNF) hruaitu te chuan an sawi. KNF a Information &Intelligence Branch (IIB) ami, ‘Colonel’ Solomon-a chuan Bangladesh a Chittagong Hill tract ah remna leh muanna tluantling a awm theihna turin he inbiakna hi neih a nih thu a sawi a. Inbiakna hmasa ber chu Munlaipara Community Centre , Bandarban ah nikum November ni 5 khan neih a lo ni tawh a ni. Solomon-a chuan he inbiakna neih zawh tak ah hian KNF atangin Lalzawngmawi, Lalsanglawm, Lal Englian, Graham, Pastor Vanlian, Ruallin Bawm, Sangpah Khumi leh Azo Lushai te chuan Kuki-Chin te ai an awh tih sawiin, Bangladesh sawrkar aiawh in Peace Establishment Committee (PEC) Chairman leh Deputy Commissioner office, Bandarban Hill District awiawh bakah Superintendent of Police, Bandarban Hill District leh DGFI (Directorate General of Force Intelligence) hotu te an tel a ni.
KNF hian Chittagong Hill Tracts-a Kuki-Chin mi te, an pi leh pute atanga ram an lo neih tawh humhalh nan leh mahni inrelbawl sawrkar din anih theihna atan ralthuam kengin hnam chhan nan movement an kalpui tih Solomon a chuan a sawi a. KNF lam atanga thu dawn dan in, inbiakna hi hi boruak ṭha tak hnuaiah, lungrual taka inremna siam theih beiseina sang tak nen neih a ni. Remna zawnga inbiakna neih chhung hian an pahnih hian inkah tihtawp remti in, sorkar palaite chuan inbiakna vawi thumna neih thuai tura ruahmanna siam turin KNF an ngen bawk a ni.
State home department record in a tarlan danin, nikum January 25 thleng khan Bangladesh aṭanga raltlan 1,167-in Mizoram-ah awm a, an vai hian Mizoram chhim lam ber Lawngtlai district-a inkhuar vek an ni. A tir lamah chuan Mizoram-Bangladesh venhimna enkawltu Border Security Force (BSF)-te chuan raltlante hi Mizoramah luh an phal sak lova, amaherawhchu, state sorkarin humanitarian ground atanga thlir in ral tlan te hi tuamhlawm a remtih hmu ah Lawngtlai district-ah humhimna hi pek an ni leh ta a ni.
