Chief minister Pu Lalduhoma chuan a sorkar flagship programme ‘Bana Kaih’ ruahmanna chu tun thla hian hawn hman an tum thu leh chutah chuan Chief Minister Special Scheme a awm dawn thu a sawi.Inrinni-a Tourism department hnuaia tour operator pakhat, Evergreen Tours & Travels leh Chungtlang Lo Zawh Organising Committee ten an buatsaih Chungtlang Zau Lo zawh chu Pu Lalduhoma’n a hmanpui a. Chief Minister chuan Chungtlang khua chu thelret ching tam khua an nih thu sawiin kalphung thar mipui sawrkar hian rubber hi a ngaih pawimawh avangin Chief Minister Rubber Missions kalpui tan ni a ti a. An khuaah hian hmalakna tam tak an nei chhoh zel a rinawm thu a sawi a. Hand holding scheme-a Chief Minister Special Scheme hnuaiah hmalakna tur a zira cheng nuai khat thleng dawn theihna tur awm thu sawiin, loan cheng nuai sawmnga thleng puk theihna a awm dawn bawk a. Chutah chuan guarantor-ah sawrkar a tang ang a, a thawk thate chu loan laka a pung zawng zawng pawh sorkarin a tumsak bawk ang.
Pu Lalduhoma chuan hetiang hmalakna hi India rama kalpui thei awm chhun an ni dawn ni a sawiin, mipui sawrkar an nih ang ngeiin tumah thlei bik nei lovin, a ti tak tak tur an nih phawt chuan kan Handholding Scheme hi an dil thei ang, a ti a. Mizoram hmasawnna tura sawrkar ruahmanna sawiin mipuite taihmakna ram, hlawhtlin tuma bei tak tak tamna ram hi ram changkang leh hmasawn an ni zel a. Chutiang mi te chu a tahtawlin an banah kaiin an khaichhuak dawn a ni a ti a. An hlawhtlin ngei rin thu a sawi a. An sawi tawh thin ang khan thlai thar pali an thlante kha a rate an puan ang khan sawrkar chuan support price a pe dawn a. Tute’n emaw sawi pawr an lo tum a nih pawhin lo lo awih lo tur leh sawrkar chu a dinna ngaiah nghet takin a ding reng a ni tih hre turin a chah a ni.
Chungtlang hi Reiek thlanga awm a ni a. Chhungkaw 100 vel an cheng mek a. An khaw ram tlak lama Tut lui phaiah chhungkaw 80 velin Rubber kung 50,000 chuang an nei mek a, Mizorama Rubber Cluster lian ber niin an insawi. Chhungkaw 70 vel chuan an hnai tan tawh a ni.
