Tun thla ni 19 atanga tan tur Mizoram LegislativeAssembly inkhawm (budget session) atan sorkar dan siam tura duan thar The Mizoram Private Placement Agencies (Regulation) Bill, 2025 leh The Mizoram Urban & Regional Development Bill, 2025 te thehluh a ni tawh. Assembly secretariat atanga thudawn danin he’ng bill puitling lut zinga a hmasa zawk hi Labour, Employment, Skill Development & Entrepreneurship (LESDE) atanga lut a ni a, a hnuhnung zawk hi Urban Development & Poverty Allevation (UD&PA) department atanga lut a ni. He’ng bill pahnih bakah hian Finance department atangin dan siamthat tur The Mizoram Goods & Service Tax (First Amendment) Bill, 2025 chu thehluh a ni tawh bawk a. Higher & Technical Education department-in Mizoram state university bill an thehlut tawh bawk na-in official taka dawn fel a la ni lo ni a hriat a ni.
Official Resolution pakhat lut tawhin, heihi environment, forests & climate change minister Pu Lalthansanga’n assembly pawmpui tura a putluh tur a nih thu dawn a ni a. Hei hi Parliament-in dan a lo pawm tawh “The Water (Prevention & Control of Pollution) Act” Mizoram assembly in a lo pawmpui (ratify) vena tur ni a thu dawn a ni. Mimal thehluh (private resolution) 85 a lut tawh a. Zirtawpni hi Private member-te puala hun hman thin a nih lai-in tun assembly session-ah hian Zirtawpni vawi khat February ni 21 bak chu Zirtawpni apiang chawlh a nih dawn avangin hun a awm dawn lova. February ni 21-ah pawh hian Prime Minister hlui Dr. Manmohan Singh sunna hun bakah larsap thusawi lawmthu sawina motion sawiho ni tur a nih dawn avangin hun a tlem hle dawn a ni.
Zawhna hi House chhunga chhan chi (starred question) 740 leh ziaka chhan chi (unstarred question) 88 a lut tawh a. House dawhkana dah tur lehkha pawimawh 5 a lut tawh bawk. Puan tawh angin tun tum Mizoram assembly inkhawmah hian March ni 4 khian finance changtu chief minister Pu Lalduhoma chuan tangka kum thar (2025-2026) atana Mizoram sum hman tur ruahman (annual budget) chu a pharh ang a. Hei hi budget a vawi 2 pharhna tur a ni a, tun tangka kum kallai hi sum harsatna avangin insawhngheh kum (year of consolidation)-ah ZPM sorkar chuan a puang a. Hmalakna lian tham kalpui an tum lo sa a. Kumin budget-ah hian ZPM-in inthlan hma a an lo intiam angte tihpuitlin theihna tur budget danglam hmuh beisei a ni.
