Mizoram Legislative Assembly Speaker Pu Lalbiakzama’n zo hnahthlak hmun hrang hranga cheng te in chhawmdawl tawn zel a pawimawh a ti a, ram thenhran ah awm mahse thisena inzawm annih avangin inlungruala insuihkhawm zual a ngai tih a sawi.
He thu hi vawiina ZORO buatsaih Zo Indigenous Identity Card a pisaa a tlangzarh na ah sawiin Pu Lalbiakzama chuan UNO-in indigenous people-te a ngaihpawimawh thu leh zofate chu indigenous people-a a pawm tawh thu sawiin, hnam lian leh chak zawkte’n an awpbeh mek indigenous people-te chhanchhuah an nih theih nan UN Declaration on the Rights of People’s chu kum 2007 daih tawhah siam a ni a ti a, UNO thupuan chu hman tangkai thiam a tul tih sawiin ZORO General Headquarters-in ‘Zo Indigenous Indentity Card’ an siam chu chuan zofate’n dikna chanvo an chan theih nana tangkai taka hman a nih ngei a beisei thu a sawi.
Pu Lalbiakzama chuan zofate chu British Sawrkar ‘divide and rule policy’ tuar nasa ber a nih thu sawiin ram bung pathum India, Burma leh East Pakistan (Bangladesh) ahte thensawm an ni a ti a, India-ah State pali Mizoram, Manipur, Tripura leh Assam-ah te thendarh an ni leh tih sawiin hmun hrang hrangah awm mahse inlungrual taka an awm zel a pawimawh a ti a, insuihkhawmna thinlung pu theuh turin zo hnahthlak te a ngen tih a sawi bawk.
