Ministry of Information & Broadcasting, Govt. of India leh Press Information Bureau, Aizawl tangkawpin an buatsaih dan bawhchhiate hremna dan thar pathum chungchanga Media Workshop nikhat awh, vawiina Aijal Club-a neih chu Pu Lalbiakzama, Speaker, Mizoram State Assembly chuan khuallian niin a hmanpui. Khuallian Speaker chuan dan hriat loh chu hremna pumpelhna atan chhan tha tawk a tling lova, dan chu mi zawng zawng tana siam a nih angin dan thar inhrilhhriatna leh zirhona buatsaih a ni chu lawmawm a tih a thu a sawi a. Thil tisual te hremna dan pathum, Indian Penal Code (IPC) 1860, Criminal Procedure Code 1973 leh the Indian Evidence Act, 1872 te chu dan upa tawh tak, vawi tam tak siamthat tawh niin heng dan pathum British te hnam ze mila siam kan lo hman thin chu India ram milin July Ni 1, 2024-ah thlak a ni ta a ni a ti. Heng dan tharte hi kalphung mumal zawka Mizoramin kan hman theih nan a kaihhnawih Department, a bikin Law Department leh Home Department te chak taka inbuatsaih a, hma la tura ngenin dan siam a nih chhan mipui hrilhhriat chu darh zau taka kalpui a, dan thar hnuaiah mipuite thlamuang taka awm turin duhsakna a hlan a ni.
Khuallian chuan thutharthehdarhtu Media- te chu he dan thar pathumte mipui nawlpui hrilhhriatna kawngah leh zirtirna kawngah an pawimawh hle thu sawiin vawiina MJA member lo kalte chu an mawhphurhna a san hle thu a sawi a ni. Khualzahawm Pu Lalbiakthanga Khiangte, IPS, IGP (Law & Order) Mizoram Police pawhin dan thar chungchanga hriat tur pawimawh hrang hrangte tarlangin Mizoram Police te inbuatsaih dan te a sawi a. He dan thar hi victim centric a nih mai dawn bakah mipui nawlpui a bik takin hmeichhia leh naupangte a humhalh hle dawn a, victim compensation pawh a ngaipawimawh hle bawk a ni tiin dan tharah hian ‘justice delayed is justice denied’ tih piahlamah he dan hian kan justice system rei lutuk thin chu a ranglamin a chingfel zung zung tura beisei a ni a. Case ngaihtuah lai pawh adjournment vawihnih aia tam phal a nih tawh dawn loh thu a sawi. Tunlai thiamna hmangin FIR leh thildang pawh Electronics Communication hmangin thehluh theih a ni tawh dawn a. FIR copy pawh police hnen atangin a copy free-in a neih theih dawn bakah pawikhawihna, hnuchhui dan, hmalakna leh thlen chin te hriat theihna right a awm tawh dawn a ni a ti.
Associate Prof. P. Lalremruati, Govt. Mizoram Law College chuan Criminal dan thar pathum Bharatiya Nyaya Sanhita (BNS) 2023, Bahratiya Nagarik Suraksha Sanhita (BNSS) 2023 leh Bharatiya Sakshya Adhiniyam (BSA) 2023 awmzia leh kalphungte kalkhawmte zirtirna a pe a ni. Workshop hi Shri. Satish Nambudiripad, DG, NE Zone chuan kaihhruaiin kalkhawmte inlawmna thu a sawi a, zawhna leh chhanna hun hman niin Dr. Rajeev Lourembam, IIS, M&CO, PIB Aizawl chuan a kaihruai bawk a ni. Vawiin Workshop-ah hian Mizoram Law College, MZU IIMC zirlaite bakah MJA leh sawmbikte an tel a ni.
