Naktip, August ni 20 atanga tan tur Mizoram legislative assembly fur thukhawm atan sorkar atangin dan siam tura duan 5 a lut tawh.
Assembly secretariat atanga thudawn danin Thawhlehni a tan tur ni 2 awh assembly fur thutkhawm lo awm turah hian dan thar siam tur 1 leh dan dinglai simthat tura rawtna 4 nimin thleng khan a lut tawh a. House chhunga chhan tur chi (starred question) 263 leh ziaka chhan chi (unstarred question) 17 a lut tawh bawk a. Hei bakah hian Social Welfare & Tribal Affairs minister Pi Lalrinpuii hnen atangin official resolution putluh tur an dawng tawh bawk. Assembly inkhawmah hian MLA hlui, Gorkhali hnam zinga MLA atana ruat hmasak ber leh awm chhun Pu Kapoor Chand Thakuri sunna hun hman a ni. Pu Kapoor Chand Thakuri hi kum 1972 a Mizoramin UT a nih ruala assembly a neih khan Pi Saptawni leh Pu Lalhmingthanga te nen ruat seat-ah, khatih lai a Mizo Union sorkar khan a dah. Kumin July ni 15 khan Nepal khawpui Kathmandu-ah a thi a ni.
Assembly Fur thutkhawm hi August ni 20 a tan turin larsap Dr. Hari Bambu Kambhampati chuan a ko a. August ni 1 khan Speaker Pu Lalbiakzama kaihhruai Business Advisory Committee (BAC) thukhawm chu inkhawm hi ni 2 ni tura relin August ni 20 leh ni 21 khian an thukhawm dawn a ni.
