Tun thla ni 19 atanga tan tur Assembly inkhawm (budget session) atan tun thlengin zawhna a la lut lova, sorkar atangin dan siam tura duan pakhat a lut tawh. Assembly secretariat atanga thu dawn danin zawhna hi House chhunga chhan chi (starred question) leh ziaka chhan chi (unstarred question) pawh lut a la awm lova. Sorkar hian dan siam tura duan engzat nge putluh tur an neih tih hriat theih a la ni lo chungin tun thlengin dan siam thar tura duan pakhat a lut tawh ni-in Akashvani Aizawl chuan thu a dawng a.
Tun tum assembly inkhawmah hian Prime Minister hlui Dr. Manmohan Singh-a sunna hun buatsaih a ni ang. Puan tawh angin tun tum Mizoram assembly inkhawmah hian March ni 4 khian finance changtu chief minister Pu Lalduhoma chuan tangka kum thar (2025-2026) atana Mizoram sum hman tur ruahman (annual budget) chu a pharh ang a. Hei hi budget a vawi 2 pharhna tur a ni a, tun tangka kum kallai hi sum harsatna avangin insawhngheh kum (year of consolidation)-ah ZPM sorkar chuan a puang a.
Hmalakna lian tham kalpui an tum lo sa a. Kumin budget-ah hian ZPM-in inthlan hma a an lo intiam angte tihpuitlin theihna tur budget danglam hmuh beisei a ni. March ni 20 thleng assembly inkhawm hi kal chho tura ruahman niin hemi chhung hian tangka tum thar sum ruahman hi pawm hman tura ruahman a ni. Assembly inkhawm tan ni, February ni 19 hian larsap General Vijay Kumar Singh chuan kum khata assembly inkhawm hmasa ber a nih avangin dan pangngai angin Assembly chhungah thu a sawi ang.
