Naktuk hian Assembly inkhawmah Excise & Narcotics minister Pu Lalnghinglova Hmar-in “The Mizoram Liquor (Prohibition) Amendment Bill, 2025.” a pulut dawn a, budget chungchang a tlangpui-a sawihona-in a zui ang. Ni 3 chhung an chawlh hnu-ah Mizoram assembly inkhawm hi naktuk chawhma dar 10 leh a chanve-ah chhunzawm a ni dawn a zawhna leh chhanna hun darkar khat chhung hman a nih hnu-ah sawi hlawh tak MLP Act 2019 siam danglam tura rawtna bill chu Pu Lalnghinglova Hmar-in a pulut anga, sawiho a ni ang. Hemi chungchanga excise & narcotics department lam atanga thu dawn danin Mizorama thei, buh leh bal leh thlai thar chhuah atanga wine leh beer siamchhuah a nih theihna atan dan dinglai hi siamthat a her rem tum a ni.
Mizoram thar chhuahah hian grape chauh ni lo, balhla, lakhuihthei, sawhthing, dragon fruit, sapthei, Zobuh leh thil dang wine leh beer siam theihna ang chi atanga siam phalna atan dan hi siam that tum a ni a. Mizoram thar atang chauhva siam theih tura ruahman a ni a. Hei hian Mizoram pawna wine leh beer siam lakluh phalna a huam dawn lo a ni. Hetih lai hian horticulture minister Prof. Lalnilawma chuan Mizoram thei, buh leh bal leh thlai thar atanga ramdanga hralh chhuah (export) tlak tur wine siam chhuak tura ruahmanna an kalpui thu February ni 28 khan a lo sawi tawh bawk a ni. MLP Act, 2019 siamthatna tur bill hi kar kalta Ningani a minister putluh tura dah a ni vek tawh chungin kohhran lamin an sawisel ni a sawi, zupui leh zutuitling tih chu bill duan chhina paih a nih leh tak avangin MLA-te sem that leh a ni a.
Eptu hruaitu Pu Lalchhandama Ralte leh MLA dang pahnih Dr. K. Beichhua leh Pu C. Ngunlianchunga te chuan lo zir chianna hun pe tur leh putluh hun hi tikhawtlai tura an ngenna chu speaker Pu Lalbiakzama chuan house leader Pu Lalduhoma leh parliamentary affairs minister a rawn hnu-ah putluh leh sawihona hun hi a sawn ta a ni. Naktuk hian kar kal ta Thawhlehni a finance changtu chief minister Pu Lalduhoma’n assembly a a putluh, tangka kum thar a hman tur Mizoram budget (2025-2026) cheng vaibelchhe 15,198 leh nuai 76 a tlangpui a sawihona tan a ni dawn a ni.
