Chief Minister Pu Lalduhoma’n Aizawl khawpui atanga Assam Rifles sawn chhuah hna chu Union Home Minister-in kum khat chhunga kalpui zawh theih a ni tih a sawi thu House a hrilh. Ni hnih awh tur Mizoram Legislative Assembly pakuana thutkhawm vawi 3-na chu vawiin chawhma dar 10:30 khan Assembly Speaker Pu Lalbiakzama kaihhruaina in neih tan a ni a, he hunah hian Chief Minister Pu Lalduhoma chuan Hachhek bialtu MLA, Pu Robert Romawia Royte zawhna sawi zuinaah AR chhuah dan tur chungchanga inremna thuthlung, MoU chu sorkar hmasa leh AR-te’n a hran hran ve vea an neih chu a hlawhtlin loh avangin sorkar thar hnuaiah ama kaihhruainain ngaihtuah that leh a ni tih a sawi a, an inrem lohna laite sawiho mah se an chingfel mai thei lo a, hemi hnu hian Home Ministry kaihhruaina hnuaia chinfel thuai a rawtna chu sorkar laipui chuan kar khat chhunga tihfel an tum thu an hrilh thu a sawi.
Hetihlai hian AR lamin an MoU an ziah that an nghak leh a, sorkar laipui lam thu a hmuh chu a khawtlai ta tih sawiin, vawiin thlengin sorkar laipui hmalakna erawh a la hlawhtling lo a ni, a ti a, tuna an nghah chu MoU sawifel a nih thu sawiin, Home Minister sawi dan chuan, AR sawn chhuh hna chu thla thum dan zelah kalpuiin, kum khat chhung chuan AR insawn chhuah chu zawh fel theih a ni ang tiin a hrilh thu a sawi a ni. Pu Lalduhoma chuan AR insawn chhuah avanga Zokhawsang hmuna loneitute harsatna chingfel turin Mizoram sorkar chuan AR-te nen inbe remin feh kawng thar lai turin ruahmanna siam a nih thu a sawi bawk a ni.
