Vawk pul hri African Swine fever avangin kum hian state chhungah vawk 684 an thi tawh ni a report a ni a, ASF vanga suat tawh zat chu 387 a tling a ni. Tunlai khawlum chhovah ASF hri a leng chho leh a, ran damlo nei an awm anih chuan Animal Husbandry & Veterinary Dept phone no 1962 ah Doctor te biak rawn theih reng an ni tih AH & Vety Dept Deputy Director Dr.M. Zohmingthangi’n a sawi a ni. Akashvani Correspondent in a kawmnaah Dr M Zohminthangi chuan kum 2021 atang kumtin khawlum intan tirhin ASF hi a rawn hluar chhuak leh thin a ni, a ti a. Thlasik laiin ASF chu zia deuh thin mahse nipui a lo inherchhuahin a hri chu a rawn pung leh thin a. Vaccine rintlak tak hmuhchhuah ala nih loh avangin mipuite chu fimkhur a pawimawh takzet a ni, a ti.
Animal Husbandry & Veterinary Dept in a chhinchhiah danin Vawiin khan African Swine Fever (ASF) vanga vawk thi zat chu 11 a ni a, vawk suat zat chu 56 a ni a. Heng vawk thi te hi Muallungthuah 4 Ramhlun Sports Complex-ah 1, Hualngohmunah 1, Dulteah 2 leh khumtungah 3 a ni.
ASF vanga vawk thi zat hi Kum 2021-22 khan vawk thi zat chu 33417 a ni a, kum 2022-23 khan 12795 a ni a, kum 2023-24 chhungin 1139 niin tihian a vaiin ASF vanga vawk thi zat chu 47351 a ni tawh a. Vawk suat tawh zat hi Kum 2021-22 khan 12568, kum 2022-23 khan 11686, kum 2023-24 chhungin 980 niin tihian a vaiin vawk suat zat chu 25234 a ni tawh a. Vawk thi avanga tanpuina dawng chhungkua 2488 an awm tawh a. AH& Vety Dept chuan ASF vanga vawk chante tanpuina tur cheng nuai 311.66 an dil mek bawk.
