African Swine Fever vawk pulhri leng mek avanga kumina Mizorama vawk suat zat chuan 20,000 pel tawhin nimin thlenga vawk suat zat chu 20,033 a tling tawh.
Nimin khan vawk pulhri leng avang hian vawk 44 a thih belh leh a, vawk 58 chu he vawk pulhri darh zel tur venna atana suat a ni bawk a. Vawk thite hi Lunglei, Serchhip leh Hnahthial district amite a ni a, vawk suatna hi Aizawl, Lunglei, Serchhip leh Hnahthial district-ah te a ni. Kumin February ni 9 khan Champhai district-a Leithum khua a vawk thi chu ASF vawk pulhri vang a ni tih finfiah a ni a, heta tanga nimin thleng hian vawk 11,493 a thi tawh a. Animal husbandry and veterinary department hotute chuan tunah hian khaw 219 chu vawk pul hri lenna khua-ah an puang a ni.
Hetih lai hian tun hnai a Bungtlang South khaw bul De lui kama sanghal 17 lai ruang hmuh chu ASF vawk pulhri vanga thi an ni em tih enfiah turin Vety leh Forest department lam mite a hmunah an kal a. Vety department hotute chuan an chanchin chiang taka an la hriat theih rih loh thu an sawi a ni.
