African Swine Fever (ASF) vawk pulhri leng mekah kumina vawk pulhri darh zel venna atana vawk suat zat chu 19,130 a tling ta a, vawk thi pawh sing khat sang khat thelh a tling ta. Animal Husbandry and Veterinary department hotute hnen atanga thu dawn danin vawiin hian district 4-ah vawk 42 a thi a, he’ng district, Aizawl, Lunglei, Serchhip leh Hnahthial-ah te tho hian vawk 64 suat a ni. Kumin February ni 9 a Champhai district Leithum khua a ASF hri a leng leh tan tih finfiah a nih atanga vawiin thlenga vawk thi tawh zat chu 10,850 a tling tawh.
Zirtawpni khan nitina vawk thi zat hi a pung leh a, district 5-ah 193 zet a thi a. Hnahthial district a Tuipui D khua-ah ringawt vawk 110 a thi a ni a, vawk suat zat chu 92 a ni. A hma Ningani pawh khan vawk thi zat hi 140 niin suat zat hi 309 zet a tling a. Mamit district-ah ringawt vawk 219 suat a ni a, he district-a Ailawng khua-ah 98, West Phailengah 54, Saithah khua-ah 42 leh Reiek khua-ah 25 suat a ni.
Vety hotute chuan Ningani a Mamit district a vawk suat zat a tam chhan hi a hma lama suat tawh, report tlai vang niin an sawi a ni.
