Khawlum tan leh ruahtui tlak tan tirhin ran hri chi hrang hrang a hluar thar thin angin kuminah pawh vawk pul hri African Swine Fever chuan Mizoram district thenkhat a tuam leh tawh a, AH & Vety Dept chuan ASF hrileng hi kumtin a zia chho telh telh tura beisei a ni, a ti. Nimin khan AH &Vety Department Pu C. Lalsawivunga hovin Department Officer ten a Office Chamberah African Swine Fever chungchang a Mizoram dinhmun leh hmalak dan tur an sawi ho .
Heta tarlan anih dan chuan African Swine Fever hi kum 2021 ah Mizoram a lutchilh tan a, he natna hian state chhung a chen chilh tawh a, amaherawhchu hri len hmasak ber ai chuan vawk thi leh suatte pawh a tlem chho tial tial a, hetihlai hian hmun thenkhatah hri hi a lanchhuah leh thin avangin ranvulh tute tawrhna a thleng thin a ni. Kum 2021a ASF hrileng nemngheh anih hnuah reh taktak thei lovin kum 2022, 2023 leh 2024 ah te pawh report hi a awm chho zel a. Tunhnai a leng thar anga lang hi nikum 2023 May thla atang khan thla tin thi report hi a awm chhunzawm zel a ni tih Vety Dept hotute chuan an sawi a ni.
Pu Sawivunga chuan Mizoram chu sa a intodelh turin Department in nasa takin hma a la meka, hetihlaia African Swine Fever a leng leh thin chu pawi a tih thu a sawi a, Department a thawktu officerte theihtawp chhuah zel tura sawmin, ASF beihpui thlak naah hian mipuite tha taka Department hmalaknate tawiawm a,Sorkar dan te zawm hram hram turin a chah bawk ani. ASF hi a enkawlna damdawi a awmloh avangin fimkhur chu invenna tha ber a ni a, Ran In intlawhpawhloh, ran damlo leh sate zawrh chhuah loh, ran thite thuk taka phum that, ran in leh a vel damdawi nen a tih thianghlim fo tur a ni. He meeting hian mipui hnena a thara inzirtirna thatak neih leh ni se tiin a rel. Hriat theih chinah ASF hi Aizawl, Champhai leh Saitual ah te a leng tih nemngheh tawh a ni a, tunhnaiah vawi 174 vel a thi a report a ni bawk a ni.
