African Swine Fever (ASF) hrileng mekah Vawk vulhtute leh mipuite kan him tlan zel theih nan vawiin khan Kolasib District Magistrate Pu Robert C. Lalhmangaiha chuan Section 163 of Bharatiya Nagarik Suraksha Sanhita, 2023 in thuneihna a pek angin thupek a chhuah. District Magistrate chuan, Ram dang, State dang leh District dang atangin Vawk, Vawksa, Frozen Pork, Vawksa rep leh vawksa atanga siam reng reng lakluh a khap a.
ASF hrilenna (infected area) puanna khua atangin Vawk, Vawksa, Frozen Pork, Vawksa rep leh vawksa atanga siam reng reng lakchhuah khap tlat a ni bawk. Vawk damlote chu talh leh hralh khap a nih bakah Vawk thi te chu paih mai mai lovin thuk takah chinai nena phum bo thin tur a ni. Vawk damlo leh thi an awmin, AH & Vety official te hnenah hriattir vat tur a ni a. Hri lenna hmun (ASF infected area) atanga hri a darh zel loh nan Vawk suat duh ten AH & Vety Dept. ah dilna thehluh theih a ni.
He thupek hian chhuah anih atanga ni 60 chhung a huam dawn a, dan bawhchhia an awm chuan Section 223 of Bharatiya Nyaya Sanhita, 2023 hmangin hrem an ni ang. District Magistrate chuan he thupek hi vawiin September 12, 2024 khan Court Seal nen nemnghetin hming a ziah hnan a ni.
