Sports Minister Pu Lalnghinglova Hmar chuan kumin kum tawp lamah hian Mizoramin khawvel pum huap ban-elh intihsiakna a thlen dawn thu vawiin khan a sawi. Minister hian October thla a Asian Arm Wrestling International Cup a Mizo ban-elh chakte’n tangkapui an hlawh chhuahte lawmpuina a buatsaih a. Hetah hian Mizoramin kum tawpah international level arm wrestling inelna a thlen tur thu a puang a. Kumin December thla-ah Aizawl-ah ngei Pro Panja Mega Match Mizoram tih inelna huaihawt a ni dawn a ti a. Hetah hian khawvel huap ban-elh chakte lo kalin, Mizo ban-elh chakte nen an inhmachhawn tur thu a sawi a ni. Mumbai a October 19 atanga 26 chhunga ban-elh inelna neihah hian Mizoram atangin Denic Lalruattluanga chuan senior mipa kg 80 huangah gold medal a la a. Benjamin Lalawmpuia’n senior mipa kg 100 huangah silver medal la in, Vanramnghaki chuan kg 80 hmeichhe huanga, ding leh vei lam inelhah silver medal ve ve la in, Para Women-ah bronze a la bawk a ni.
Pu Lalnghinglova Hmar chuan infiammite tan Sports Incentive Cash Award kalpui dan chu siamthat a nih tur thu a sawi a. Infiamna a chawimawina dawng pha chinte tana pawisa fai lawmman pek thin (Sports Incentive Cash Award) chuan Olympic huanga infiamna chauh huam lovin Olympic sports discipline ni lote pawh telh an nih tawh tur thu a sawi a. Mizoram State Sports Council in association 33 a enkawl mekte pek vek theih dan chu sorkar in a ngaihtuah tih sawiin Olympic discipline ten sorkar atanga lawmpuina an dawn ang za a sawmnga zel Olympic discipline ni lote’n an dawn ve dawn thu a sawi bawk.
Vawiin vek khan Assam Rifles te chuan tun hnaia Mizo thalai pathum Asian Championship-a hlawhtlinna neite chawimawina hun an hmang a, He hunah hian Arm Wrestler pathum te chu 2nd Battalion Assam Rifles Commandant Col. Mukesh Swada chuan lawmpuina leh chawimawina thilpek a pe a, he huna tel ve Peoples Arm Wrestling Federation of India President Jhangaini Preeti chuan thusawiin Arm Wrestling-a Mizo thalaite hmasawnna chu hmuh theih khawpa a lan thu a sawi a, Mizo thalaite’n khawvel huap ang pawhin ban-elh-ah hmabak eng tak an nei tih a sawi bawk.
