Aizawl Municipal Corporation (AMC) chuan insak phal lohna hmun (Protected Area)-a in sa lui Pu Lalramsanga chu a insak thiat turin a hriattir a. Dan zawm loa insa leh lei lai nia hriat te chungah pawh hma a la mek. Municipal Commissioner Er. Lalhriatpuia kumin January ni 31 khan In thiat tura hriattirna (Demolition Order) tichhuakin, in sak phal lohna hmuna Sawrkar-in a puan, Bawngkawn atanga Durtlang Road-a In sa lui Pu Lalramsanga chu a Insak thiat nghal turin a hriattir a ni.
Demolition Order-ah hian Pu Lalramsanga hi kumin March ni 29 hmaa a In thiat zo turin hriattir a ni a, thupek a zawm loh chuan AMC-in a thiah sak theih thu leh, a thiah man senso chu Pu Lalramsanga’n dan anga a chawi a ngaih tur thu hriattir a ni bawk. Kum 2023 July ni 12 khan Pu Lalramsanga hi phalna nei lova Protected Area-a in a sak chhan sawifiahna hun pek a lo ni tawh a, a insawifiahna hi AMC chuan thu tlingah a pawmsak lova. A in thiah a nih loh chhan tur sawifiah turin kum 2023 Ocotber 25 khan show cause notice pek a ni leh a, notice hi a chhang ta lo a ni.
Bawngkawn atanga Durtlang Road-a Protected Area hi Aizawl Master Plan Vision – 2030 anga puan a ni a. Aizawl khawpui hi chenna nuam taka siam tur leh kan in leh lo te a him zawkna tura AMC hmalakna hi khauh taka kenkawh zel tum a ni a. AMC chuan dan loa lei lai leh insa mek nia langte pawh endik zelin an chungthu ngaihtuah zel a tum a ni.
