Aizawl Municipal Corporation (AMC) ward number 19 By-Election a vote tlate chu vawiin khan Aizawl DC Pisa-ah chhiar a ni a, Zoram People’s Movement (ZPM) candidate Dr C. Malsawmtluangi chu thlan tlin a ni. ZPM candiate Dr C. Malsawmtluangi hian vote 3544 a hmu a, amah hnaih bertu Mizoram National Front (MNF) candidate Dr. Lalrinzuali Hrahsel chuan vote 2502 a hmu thung a, an inthlauhna hi vote 1042 a ni. Indian National Congress (INC) Effie Vanlalhmangaihi chuan vote 1170 hmuin BJP candidate K. Vanlalruati chuan vote 102 a hmu thung.
Akashvani palai zawhna chhangin, thlan tlin thar tak Dr C. Malsawmtluangi chuan a tlin in beisei ngam a harsa tih a sawi a, a vote hmuh zat pawh a beisei aiin a sang tih sawiin vote 200 vela chak a inrin laiin vote sang chuangin a chak tih a sawi a, a bial tan tih tur a tam tih a sawi a, an bialah lei min a nasat avangin tui luankawr siamthat a ngai tih sawiin bial chhungah zan lama streetlight chhit tur neih that a pawimawh tih a sawi bawk a, bialtu hmasa in theihtawpa hna a lo thawh tawh sa chhunzawm mai tur a nih thu a sawi bawk.
ZPM Zonu Headquarters chuan vawiin khan thu chhuah siam nghalin, ram rorelna kawngah hmeichhiate’n kut kuang kuah mai lova ke an pen chhuak zel chu lawmawm an ti a, reserve seat atang leh general ward atanga hmeichhe corporator thlan chhuahte chu hmeichhiate tana ram rorelna khawvela meichher chhitu an nih hria a, thahnemngai taka an rawngbawlna hlena ram rorelna kawnga taimak chhuah sauh sauh turin an ngen a ni.
Puan lan tawh angin AMC ward number 19-na hi hmeichhe bial a ni a, a bialtu hmasa Baryl Vanneihsangi chu MLA atan a tlin tak avangin a hmun ruak luah tur thlan a a ni. Ward chhungah hian veng hrang hrang – Kulikawn, Tlangnuam, Tlangnuam Vengthar, Saikhamakawn, Melthum leh Hlimen te an awm a ni. By-election-ah mi 7,342-in vote an thlâk a, vote tla hi za zela 55.02% a ni. Polling station 15 awmin vote nei mi 13,344 zinga 7,342 (mipa 3,407 leh hmeichhia 3,935)-te’n vote an thlak a ni.
