He hnatlangah hian mi 150 chuang thawk chhuakin Tuikual Lui hnar, Khatla Veng Field thlang kawr atangin bawlhhlawh chi hrang hrang – plastic bottle, sarang, burchhia, pawnchhia leh a dangte an thiar chhuak a, AMC motor hmangin bawlhhlawhte hi Solid Waste Management Center, Tuirial-ah an paih nghal a ni.
He hnatlang hawnna hun hi Pu Rohmingliana, Save The Riparian in a kaihruai a. Aizawl Mayor Pu Lalrinenga Sailo chuan Save The Riparian hmalakna chu chhuanawm a tih thu a sawi a. AMC in Aizawl khawpui faina kawngah theihtawp a chhuah mek tih sawiin nasa leh zualin hma a lak chhunzawm zel tur thu a chah bawk a ni.
He hnatlangah hian Aizawl Mayor bakah hian Corporators te leh AMC Office-a thawktute leh Save The Riparian hruaitute leh member te an thawk chhuak a. Hnatlanga thawk chhuak ten faina kawnga tha an thawh thei chu lawmawm an ti hle a ni.
AMC chuan a hmun lova bawlhhlawh paihin chenna leilung a tihchhiat mek thu leh nungchate tan thihna a thlen nasat thin avangin bawlhhlawh paihna hmun a siamah chauh bawlhhlawh paih thin turin mipuite a ngen a. Veng tinah bawlhhlawh khawn thin a ni a, hengah te chauh hian bawlhhlawh te tha taka thliara paih thin turin Aizawl mipuite a ngen a. Faina leh thianghlimna kawngah hma sawn tum anih avangin loh theih lohin dan leh inkaihhruaina zawmlote chungah hma a la zel dawn tih an sawi bawk.
