Aizawl Municipal Corporation chuan an thuneihna huam chhunga Restaurant, Hotel leh Hostel-te chu endik vat a nih tur thu vawiin khan an sawi.
He thu hi Aizawl Press Club-a AMC Board of Councillors thukhawmin hemi chungchanga hma la tura a din, Committee on Regulations of Restaurant, Hotel and Hostel-te’n Chanchinbu mite an kawmnaah sawiin, endikna an kalpui dawn avanga thingpui dawr, hotel leh hostel siamte chu November thla chhung hun an pek thu leh hemi hnu lama dan zawm lo te chungah dan ang a action lak a nih tur thu an sawi a.
Endikna an kalpui turah tehfung hrang hrang AMC hnuaia inziaklut an nih leh nih loh chungchangte, an registration a nun leh nun loh bakah dawr neitu ten AMC phut anga signboard-ah an dawr license number an tar chhuak em tih te, bawlhhlawh an thlair fel leh fel loh chungchangte, eitur siam tute leh hotel leh hostel siam tuten faina leh thianghlimna an kalpui that leh that loh te an enfiah dawn tih an sawi a. November thla chawlhkar hnihna atanga hmalak tan an tum thu an sawi bawk.
