PHE Minister Prof Lalnilawma’n Aizawl khawpuia cheng te tan nitin tui litre maktaduai 66.72 anih laiin tun dinhmunah litre maktaduai 28.77 pump chhuah thin ani tih a sawi. He thu hi vawiina Assembly thutkhawmah sawiin Minister chuan Aizawl khawpuiah mihring nuaih 3, sing 7 sang 8500 vel awm ang a ni a ti a, tui hnianghnar taka dawng tur chuan Central Public Health and Environmental Engineer Organisation Guidelines ah nitin litre maktaduai 135 dawng tura tih ani tih sawiin Aizawl mipuia cheng te dinhmun chhutin tui litre maktaduai 66.72 chu nitin mamawh anih laiin tun dinhmunah Aizawl khawpuia cheng te tan tui litre maktaduai 28.77 pump chhuah ani tih a sawi.
Minister chuan Greater Aizawl Water Supply Scheme Phase 3 chu zawhfel anih hmaa hawn anih thu a sawi a, kum 2020 september a zawh tura ruahman ni si la zawh loh chhan chu Ministry hmasa ten hna an thawk muang ani thei a ti a, la function si lo in nikum september thla ah hawn ani tih sawiin Diesel engine hmanga trial run ani a ti a, an innghahna ber chu electric engine ani tih sawiin diesel in pump dawn se sum leh pai dinhmunin a tlin lo tih sawiin power hmanga a hmuna tihnun theihna turin kumin february ni 9 ah load security atana thla thum chhung expenditure hisap lawk cheng vbch 5.59 chu P&E Department ah deposit fel ani tawh a ti a, Electric tih nun hnua hman theih anih hnuah a khawl chu SIPMIU lamin an enfiah dawn tih sawiin heng a fel hnuah tui supply awm thei tura beisei ani a ti a, zawhfel vek tawh hnuah an hawng nawn maithei tih sawiin kumin March thla velah zawh fel ani dawn tih a sawi.
Minister chuan Jal Jeevan Mission hnuaiah Mizoram puma khaw 728 ah tui connection pek ani tawh a ti a, kumin March thlaa tawp tura ruahman ani a ti a, zawh fel loh hmun hrang hrangah ala awm tih sawiin in tin ten tui litre 55 nitin an dawn theih nan chak takin department hma a la mek tih a sawi.
