Vawiin Cyclone Remal vangin Aizawl hmun hrang hrangah chhiatna tam tak a thleng a. Melthum Quarry bula in chim a chhiatna thlengah ruang 14 lakchhuah ni tawhin,Mizo sawm leh vai pali te an ni. Mi pahnih chu dam a chhanchhuah an ni. Chhanchhuah hnathawh hi State Disaster Response Force (SDRF) te, Melthum Local Council leh YMA tangkawp chuan an la kalpui zel a ni.
Hlimenah leimin avangin mi pali in nunna an chan a, chhanchhuah hna thawh kalpui zel a ni. Salem vengah hian mi pathum- hmeichhia pahnih leh mipa pakhat in nunna an chan bawk. Falkawnah mi pahnihin nunna an chan.
Kelsih leh Lungsei-ah leimin avangin mi pakhat ve ve an boral. Aibawk-ah mi pahnih an boral a, ruang lakchhuah tum a beih mek a ni.
Chief Minister Pu Lalduhoma leh Disaster Management and Rehabilitation Department Minister Pu K Sapdanga leh officials dangte chuan chhiat tawh a hmun hrang hrang an tlawh.
Chief Minister Lalduhoma chuan Cyclone Remal avanga Mizoram chhunga chhiat tawkte tan zangnadawmna cheng vaibelchhe 15 pek chhuah tur a ruahman a, chhiat tawk chhungte hian nuaih 4 theuh dawng tura ruahman a ni bawk. SDRF dan angin sawrkar chuan chhiat tawk chhungkua hi nuaih hnih a pe phawt anga, nuaih hnih dang chu pek leh an ni ang. Hnam dang nunna chante hi an bank account ah ex gratia hi thunsak an ni bawk ang.
