Mizoram sorkar chuan sorkar hnathawk, aikal late chu ni 30 ral hmain an hna thawk chhunzawm turin a hriattir a. Department of Personnel & Administrative Reform (DP&AR) secretary Pu K. Lalthawmmawia chuan nimin khan Office Memorandum a ti chhuak a ni. CCS (Conduct) Rules hnuaiah sorkar hnathawkte chu an hnaa rinawm tur te, inthununna leh an tih tur leh mawhphurhna te ngaipawimawh tura beisei an ni a, thuchhuah atanga ni 30 ral hnua hna chhunzawm lote chu dan loa chawl anga ngaih an ni ang tih thuchhuahah chuan tarlan a ni a.DP&AR Office Memorandum tarlan dan chuan, sorkar hnathawk zingah hun rei tak tak aikal chhawr te chu mahni hna ngaihthahna a nih thu te, mahni hna thawk tha duh lote chu CCS (Conduct) Rules, 1964 hmanga hrem theih an nih thu te, aikal late chungah sorkarin dan anga action a lak dawn thu te, kumin June ni 6-a Council of Minister thukhawmin aikal lâk rêng rêng titawp vek turin thutlukna a siam thute a chuang a ni.
Sorkar hnathawk aikal late chungchangah a tul anga hma la tur leh bawhzui turin department hotute chu hriattir an ni a, an bawhzui dan chu hriattirna chhuah atanga ni 45 chhungin DR&AR-ah thehlut tura tih an ni. Damlo leh natna khirh neite chu hriatthiamna a awm dawn a, dan angin chawlh an neih ang zawng zawng an lak phalsak an ni dawn a. Damlo leh natna khirh tuartute chu Medical Board atanga Medical Certificate of Incapacity laa thehlut tura chah an ni a, an dinhmun a zirin ngaihhnathiamna pek theih an ni ang.
Tun dinhmuna aikal la mek, an hna thawh chhuanzawm duh lote tan CCS (Pension) Rules 1972 angin voluntary retirement, invalid pension leh compulsory retirement-te dil leh pek theih a ni dawn a, dan awm sa anga chawl thei lote tan Special Voluntary Retirement Scheme siam tum a ni bawk. Sorkar hnathawk aikal late ni 30 chhunga an hna chhunzawm tura hriattirna hian Mizoram sorkar hnuaia hnathawk zawng zawng – regular employee, co-terminus (CSS), part time, casual, work charged, contract leh provisional employee te a huam vek a ni.
