Vawiin khan Animal Husbandary and Veterinary (AH&Vety) Department changtu Pu C Lalsawivunga chuan Thenzawla AH&Vety farm a tlawh a. Tihchangtlun lehzual dan tur ngaihtuahin an hmalak mekna leh hmachhawpte a hmunah a enfiah a ni. Minister Pu C Lalsawivunga chuan sa leh bawnghnuteah Mizoram kan intodelh theih nan beihpuithlak a ni dawn, a ti a. Saa kan intodelhna tura hmanraw pawimawh ber te zinga mi chu ran chaw (fodder) a intodelh hmasak hi a ni a, fodder hi a tam thei ang ber siamchhuah tum niin Thenzawl Vety farm ah chak taka hmalak tum a ni, a ti. Mizorama bawng vulhtute harsatna sutkian nan Bana Kaih Policy kaltlangin ran vulhtute hnenah fodder pek chhuah a ni dawn a. Kut hnathawktuten fodder hi an rawn phurh chhuah ngai loin an bawng vulhna hmun thleng Department motor-in a phurhsak a nga, a fodder man chawi loin a phurhna atana petrol/diesel man chauh kut hnathawktute hian an chawi ang, Minister chuan a ti.
Pu C Lalsawivunga chuan Thenzawl Vety farm hi chipchiar takin a fang chhuak a. Se vulhna hmun te, ar vulhna (poultry farm) te, kel chi tha inthlahpunna tur hmunhma te, zovawk farm te, fodder siamna hmunpui te a tlawh a. Heng an hmalak mekna te chak leh zuala a kal theih nan Vety farm humhalh a tulzia sawiin Pu C Lalsawivunga chuan khawtlang hruaitute, VC leh mipui mimir ten a hmunhma humhalh pui turin a ngen a. Department lam pawhin fencing tha zawk siam dan tur ngaihtuah an tum thu a sawi bawk. Thenzawl farm-ah hian ran chaw fodder plantation neih mek zau zawng hi 15 hectare dawn lai a ni a, hmarchhak state te zingah sawrkar hmalaknaa fodder plantation nei zau ber state kan ni. Kumin atang hian nasa lehzuala hmalak tum niin tin 40 hmun vela zauah fodder plantation neih belh tum a ni a. Heng atanga ran chaw siam chhuah te hi Mizoram hmun hrang hranga bawng vulhna hmunah te sem chhuah a ni dawn a ni.
Thenzawl Vety farm ah hian se chi tha tihpunna tur buatsaih tum niin tender chhuah mek a ni a. Tunah hian pui ruk (6) leh a pa pakhat (1) dah mek a ni. Kel tihpun tumin nasa takin hmalak a ni bawk a. Rajasthan atangin kel chi lian chi sirohi leh beetal lakluh a ni a. Kel chi tha, kum khatah no vawihnih tal nei thei tur leh a pumraw lian tha siam chhuah tumin phai atanga kel lian chi an lak luh te leh Mizo kel vulh thin panngai te inthlahpawlh (crossbreed) tir an ni a. Crossbreed hi a tahtawl a tih chhunzawm zel tur niin an that tawk leh tawk loh zir chiang a, enchhinna neih chhunzawm zel a ni dawn tih Department hotuten an sawi a ni.
Mizoramin vawk breed kan neih Zo Vawk hi a bo loh nan Vety Department hian Thenzawl farm-ah engemaw zat an vulh mek a. Zo vawk hi Mizo pi pu ten an lo vulh thin, kan ram mil a nih avang leh vulh a hautak loh vang te, a sa a tui bik avang tein mipui nawlpuiin an vulh uar lehzual theih nan Department chuan tan a la a. A hmunhma te vawiin khan Vety Minister Pu C Lalsawivunga hian a tlawh a ni.
