Kum thar pualin vawiin khan AH & Vety. Minister Pu C. Lalsawivunga hovin Department officer te’n Mizoram State Veterinary Council Conference Hall, Khatla, Aizawlah inhlan tharna hun an hmang.Minister Pu C. Lalsawivunga chuan Pathian hruaina changa kum thar hun duhawm tak thlen a ni chu lawmawm a tih thu sawiin, department officer-te chu rilru leh inpekna thar nen, an thiamnate mamawhtute tana thahnemngai taka hmang turin a fuih a. Mipuite’n an lakah leh department chungah beiseina sang tak an neih thu sawiin, mipui beiseinate tihlawhtling thei tura thahnemngai taka thawk turin a chah bawk.
AH & Vety. Minister chuan sa leh bawnghnute thar chhuah lama intodelh tura tanlak nasat a ngaih thu sawiin, hemi atana pawimawh tak ran chaw chin leh sawngbawlna lama harsatna awmte pawh a sutkian dan tur ngaihtuah a tul thu a sawi a. Kumtluana theihtawp chhuaha mahni mawhphurhna theuhte tha taka hlen chhuah tum turin AH& Vety. Department hnuaia thawktu zawng zawngte a chah a ni.
He hun hi Pu C. Lalsangliana, Secretary, AH & Vety. Department chuan kaihruaiin Dr. K. Lalhlimpuii, Jt. Director (LH) in hunserh a hmang a. Chawhnuah Secretary kaihhruaiin technical session neih a ni a; he hunah hian department hmalakna tur hmachhawp hrang hrangte an sawi ho a ni.
