Vawiin khan Aui Garden, Champhai Phai pheiah Hnahsin Kut chu Adviser to Chief Minister (Planning & Finance) Pu TBC Lalvenchhunga chuan a hawng a. Adviser to CM (Technical), Champhai North bialtu MLA ni bawk Er H. Ginzalala leh Champhai South MLA Lt. Col. Clement Lalhmingthanga te pawhin khualzahawm niin he hun hi an telpui a ni. Khuallian Pu TBC Lalvenchhunga chuan Hnahsin Kut hlawhtling taka neih a nih theihna tura hma la tu – Organising Committee, Champhai Nature Conservancy leh sawrkar hotute zahna chibai a buk a. Champhai khawtlang hruaitu hmasa, Phai phei leh hmun pawimawh dang lo humhalh ṭhintu te chungah lawmthu a sawi bawk.
Adviser to Chief Minister chuan Champhai District chuan Swadesh Darshan 2.0 hnuaiah leh sawrkar scheme hrang hrang aṭangin hmasawnna tak tak a hmuh a beiseiawm tih sawiin mipuite chu sawrkar hmalakna te thlawp a, thawhpui thiam turin a ngen a. Champhai khawpui chu khawpui ṭhang lai a nih angin, ruahmanna fel tak nen duat taka enkawl a pawimawh thu a sawi bawk. Adviser to CM hian Hnahsin Kut zara mipui ten eizawnna remchang an neih belh chu lawmawm a tih thu a sawi a. Champhai chu Mizoram buhzem ‘Rice Bowl of Mizoram’ tia chhal ṭhin a ni a, Mizoram tan buhfai chauh ni lo, Tourism hmanga buhzem a nih chhoh theih a beisei thu a sawi bawk a ni.
Khualzahawm Adviser to CM Er. H. Ginzalala chuan Hnahsin Kut chu khualzin hip kawnga bung thar kai theihna pawimawh tak a ni tiin Mizoram sawrkar pawhin theihtawp chhuah pui zel a inhuam a ni, a ti a. Champhai District chu Mizoram Tourism hmunpui ni tura theihna nei a ni a, Swadesh Darshan 2.0 leh hmun hrang hrang aṭangin Tourism tihhmasawnna tur hmuh theih a beiseiawm tih a sawi bawk. Champhai South MLA Lt. Col. Clement Lalhmingthanga pawhin thu sawiin Hnahsin Kut hlawhtlinna atana thawktu leh beitu zawng zawng te chu chibai a buk a. Hnahsin Kut chu zau zawk mi ten an hriat a, kut hlu leh pawimawh tak a nih chhoh zel a beisei thu a sawi a ni.
