Adviser to Chief Minister Pu H. Ginzalala’n Mizoram leh Manipur inkalpawhna kawng siamtha turin sawrkarin theihtawp a chhuah a ti a, Helicopter service tam zawk a awm theih nan sawrkar laipuiah an dil thu a sawi. Manipur-a zohnahthlak Martar 12 te sunna hun Peace Ground, Tuibuang-a neih a hmanpui na ah he thu hi sawiin Pu Ginzalala chuan Mizoram leh Manipur inkalpawhna kawng tha a awm theih nan sawrkarin hma a la mek a ti a, furpui thlen leh hma ngeiin kawngpui tha neih an tum tih sawiin Tuivai lei dawh hna pawh thawh mek a ni a ti a, Helicopter service a awm theih nan theihtawp chhuah a ni tih sawiin Khawdungsei ah helicopter service a awm theih nan sawrkar laipuiah an dil a ti a, Mizoram chu chak lakna pawimawh tak anih avangin theihtawp an chhuah mek a ti bawk.
Champhai North bialtu MLA chuan Manipur zohnahthlak te chu inngeih tlang taka tan ho a pawimawh a ti a, induhsaka inhmangaih tur annih laiin inlungruallohna a awm thin chu pawi a tih thu sawiin tangrual turin hnam tin te tan lak thar a pawimawh a ti bawk.
Pu Ginzalala chuan Mizoramah hnam tenau te duat tak leh tha taka enkawl thin an ni a ti a, hnam te zawk te chu duhsak an hlawh thin tih sawiin rorelna tha a awm avangin hnam hrang hrang awm mahse inlungrual takin an awm thin a ti a, Manipur ah erawh rorelna tha a awmloh avangin hnam tenau te nek chep an ni a ti a, sawrkar laipui chu a rang thei anga an buaina chingfel tura an duh thu sawiin inremna tluantling a awm theih nana hma la thuai turin an duh thu a sawi bawk.
