Vawiin khan Ministry of Information & Broadcasting, National Film Development Corporation leh Directorate of Information & Public Relations, Govt of Mizoram tangkawp ten Mizorama a vawi khatna atana an buatsaih, ni thum awh tur ‘Lemchan – Mizoram Film Festival 2026’ chu I&PR Office, Treasury Square-ah tan a ni a. A hawnna inkhawm hi Pu B. Lalchhanzova, Minister, Information, Public Relations, Printing & Stationery (IPRP&S) Department chuan Mini-theatre, Lianchhiari Run-ah hmanpuiin, festival hi a hawng nghal a ni.
Minister Pu B. Lalchhanzova chuan a vawi khatna atana Lemchan – Mizoram Film Festival buatsaih a ni chu lawmawm a tih thu a sawi a. Mizoram-in mi thiam leh creative tak tak kan ngah thu sawiin, Film Festival chu Mizo filmmaker-te tan an thiamna pho lanna leh khawvel hmaa Mizo thawnthute pho chhuahna hmun pawimawh tak a nih thu a tarlang a. Film siam lamah ram dangte nen thawh hona tha neih a duh thu a sawi bawk. Minister chuan film hi chanchin thehdarhna hmanraw tha tak, mipuite hlimna petu leh zirtirna tha tak tak pek chhuahna a nih bakah, mizo thalaite thiam theih zawng tak thil a nih thute sawiin, “thalaite tan eizawnna siamtu, employment generation pawimawh tak a nihnate hi ngaihthah chi a ni lo” a ti a; film lama mizo thalaite talent hai chhuah a nih zel theih nan leh ram tan hlawk zawka an thawh zel theihna turin sawrkar pawhin hma a lak zel tur thu a sawi bawk a. Filmmaker-te, artist-te leh he festival chhimtu zawng zawngte hnenah festival hlimawm tak leh hlawkthlak tak nei turin duhsakna a hlan a ni.
Pi Betsy Zothanpari Sailo, Secretary, IPRP&S chuan kalkhawmte lawmna thu sawiin, he festival buatsaih tura I&PR Directorate hmalakna chu fakawm a tih thu a sawi a. India hmun hrang hrang atanga film lama mi thiam sawm bikte hnenah an hun hlu tak senga he Festival an rawn chhim theih avangin lawmthu a sawi.
Festival chhim tura sawm, Bollywood film engemaw zata chang tawh, Pi Lilette Dubey pawhin festival hawnna inkhawmah hian thu sawiin, Mizoram Film Festival chhim tura sawm a ni chu lawmawm a tih thu a sawi a. Lemchan leh rimawi hi kum tam tak ral hnu pawha an hlutna hloh lo an nih thu leh hnam hrang hrang leh tawng hrang hrang hmangtute thlun zawmtu pawimawh tak a nih thu a sawi.
Pi Gouri Nair, Head, Domestic Film Festival, NFDC pawhin thusawiin, he festival hi Mizoram leh North-east region-a film lama hmasawnna thlentu pawimawh tak ni se a tih thu a sawi.
Lemchan – Mizoram Film Festival hi I&PR office, Treasury Square-ah February 16-18, 2026 chhung neih tur a ni a. Ni thum chhung hian film lama mi thiamte hnen atangin zirtirna hrang hrang neih a ni dawn a, state hrang hrang film thlan bikte leh Mizo film-te chhuah (screening) a ni dawn bawk. He festival-ah hian India ram state hrang hrang atangin film siam lama mi thiam eng emaw zat sawm an ni.
