Ni li (February ni 23-26) chhung Mizoram tlawh tura lokal 16th Finance Commission Chairman Dr. Arvind Panagariya leh member dangte chuan zanin khan Mizoram Larsap Gen (Dr) Vijay Kumar Singh, PVSM, AVSM, YSM (Retd) chu Raj Bhavan-ah hmuin an kawm. He hunan hian Larsap Gen (Dr) Vijay Kumar Singh, PVSM, AVSM, YSM (Retd) chuan Mizoram state dinhmun zirchianna nei tura rawn tlawhtu 16th Finance Commission Chairman leh member zawng zawngte thinlung taka a lo lawm thu a sawi a. Mizoram tana pawimawh leh tul hrang hrangte sawipuiin, Mizoramin chhiah (revenue) a lakluh tam loh avangin sawrkar laipuia rawtna an thlen hunah pawh hriatthiamna nei turin a chah a ni.
Heng bakah hian Larsap chuan Mizoram chu tlang rama awm a nih avangin hmun dangte aia hmasawnna ruhrel siam a harsat dante a hrilh bakah, thenawm ram buai avanga raltlanin an pan nasat thu leh hemi buaipui kawnga harsatna tawhte a sawi lang bawk a. Mizoram kaltlanga ruihhlo tawlh a hluar nasat avangin hemi do kawngah hmalak nasat a tul tih sawiin, dan leh thupek kenkawh kawnga mamawhte thawmthat a tul hle a ni, a ti a. Airport tihchangtlung chungchang bakah thalaite tana hna tam zawk siam a nih theih nana hmalak a tul thu a sawi bawk. 16th Finance Commission-te hian vawiin khan Mizoram lo thlengin Hunthar Veng lei tla hniam an tlawh nghal a. An cham chhung hian Chief Minister, Sawrkar official-te, political party-te, ADC-te, Local Body-te, Trade & Industry leh VC-te an kawm dawn bakah Chanchinbumite an kawm bawk ang. Zoram Medical College & Hospital, Falkawn, Thenzawl leh Serchhip te tlawhin Handloom Centre leh hmunhma pawimawh dangte an enfiah dawn bawk a. Zirchianna behchhan hian Sawrkar laipuiah rawtna an thlen dawn a ni.
16th Finance Commission atanga lokalte hi Chairman Dr. Arvind Panagariya bakah member dang Pu Ajay Narayan Jha, Pi Annie George Mathew leh Dr. Manoj Panda te niin, official pawimawh dangte’n an rawn tawiawm bawk a ni. Sawrkar laipui leh State sawrkar inkara April ni 1, 2026 atanga chhiara kum 5 chhung chhiah lak luh insem dan tur zirchiangtu 16th Finance Commission hi India Danpui Article 280 hnuaiah December 31, 2023 khan din a ni a, Chairman bakah hian full time member mi 4 an awm a ni.
